الرئيسية / سلايدر / الإنسانية كلّها تختزل في هذه الحكاية.. رفض مبلغ كبير من أجل قطة وضعت أولادها داخل سيارته

الإنسانية كلّها تختزل في هذه الحكاية.. رفض مبلغ كبير من أجل قطة وضعت أولادها داخل سيارته

روي أحد الأشخاص علي موقع التواصل الاجتماعي “فيس بوك” قصة إنسانية يجب أن نقف أمامها كثيرا، حيث قال: ” القصة دي لو كانت حدثت في أوروبا لكان أتعمل لها آلاف الشير وكنا تغنينا برحمه ورقي وإنسانية الأوروبيين.. ولو حدثت في أمريكا كان أتعمل عليها فيلم في هوليوود.


وأضاف أن القصة باختصار حدثت يوم الاثنين الموافق ٢٠١٨/١١/٥ الساعة ٨ مساءاً كنت رايح اشتري قطعه غيار استعمال من عند محل اسمه آل عبد الحميد قطع غيار مستعمل في الحرفيين، وانا قاعد مستني الولد يجيب القطعة من المخزن..عدي واحد بيقول يا جماعه ما تدوني نص العربية بقي بلا قطه بلا زفت، فرد عليه شاب قاعد في المحل بيقوله عدي كمان خمس أيام تكون القطه تشد حيلها .

وأشار إلي أن المشتري أظهر الضيق من ردت فعله، حيث قال له المشتري يعني هاترجعني الشرقيه فاضي علشان قطه، والحقيقة الراجل المشتري شتم ومشي.. فلفت انتباهي أن فيه موضوع بجد فسئلت البائع واضح إنكم ماكنتوش بتهزروا هو ايه الحكاية..وأكمل الراوي حديثه، فقال لي البائع..مش بنهزر ..الحكاية أن قطه ولدت امبارح في نص العربية “السوناتا دي” ، وبصراحة مستحرمين نبيع النص دا لحسن القطه تهرب وأولادها يموتوا وناخد ذنبها.. فقلت له بكم نص السيارة فقال لي ب ١٥ ألف جنيه..فقلت له رفضت بيعه بـ١٥ ألف جنيه والسوق مريح علي الآخر علشان قطه والده في العربية.. فقال لي تغور الفلوس بس القطه روح وأولادها روح ومنقدرش نتحمل الذنب ده عند ربنا لو أولاد القطه ماتوا.

وأنهي الراوي حديثه، بصراحة حبست دموعي بالعافية وقلت له ممكن تصورلي القطه علشان عاوز اكتب القصه دي علي صفحتي مدعمه بالصور .. فعلا صور القطه جوه شنطة العربية واولادها في حضنها بيرضعوا..طبعا لو كانت القصة دي بلاد خواجات كنا هللنا لهم.. لكن دول مصريين بسطاء لكن عندهم رحمه وإنسانية يهتز لها عرش السماء.


وتابع، الحكاية دي انا شاهد عليها بنفسي وأقسم بالله كل حرف كتبته حصل.. علشان كده مصر دي ها تفضل محفوظة ليوم الدين لان فيها ناس بيعملوا خير في السر يملأ محيطات من الحسنات..
عرفوا الدنيا أن مصر فيها ناس بسطاء وتعليمهم محدود والحالة علي القد لكن عندهم رحمه وإنسانية تملأ الكره الأرضية، ملحوظة نص السيارة الرمادي دا هو ال فيه القطه بأولادها.